Eksportet shqiptare rriten kryesisht falë tregjeve jashtë BE-së
Tregtia e Shqipërisë me partnerët jashtë Bashkimit Europian po zgjerohet më shpejt se ajo me vendet e unionit. Në dhjetë muajt e parë të vitit 2026, eksportet shqiptare u rritën me 6.6%, por shitjet drejt BE-së mbetën pothuajse në të njëjtin nivel me një vit më parë.
Eksportet arritën në 310.5 miliardë lekë, nga 291.3 miliardë në janar-tetor 2025. Prej tyre, 212.3 miliardë lekë shkuan drejt vendeve të BE-së. Ndërkohë, shitjet drejt vendeve jashtë unionit u rritën me mbi 24%, në 98.2 miliardë lekë. Kjo do të thotë se rritja e përgjithshme e eksporteve gjatë periudhës erdhi thuajse e gjitha nga këto tregje.
Kina dhe SHBA-ja shënuan rritjet më të dukshme mes partnerëve kryesorë: eksportet shqiptare drejt Kinës u shtuan me rreth 59%, ndërsa ato drejt SHBA-së me 41%. Rritje pati edhe në eksportet drejt Kosovës, Greqisë dhe Gjermanisë. Në të kundërt, shitjet drejt Italisë ranë me 2.4%, ndërsa drejt Spanjës me mbi 31%.
Ndryshimi shihet edhe te importet, të cilat u rritën me 5.6%, në 777.8 miliardë lekë. Blerjet nga vendet e BE-së u zgjeruan vetëm me 0.2%, krahasuar me 11.3% për ato nga vendet jashtë unionit. Importet nga Kina u rritën me 20.2%, në 117.1 miliardë lekë, ndërsa ato nga SHBA-ja pothuajse u dyfishuan, duke arritur në 28.7 miliardë.
BE-ja mbetet partneri kryesor tregtar i Shqipërisë, por shifrat e dhjetëmujorit tregojnë se rritja e fundit po mbështetet gjithnjë e më shumë te tregjet jashtë unionit.