Pagesat në Shqipëri, lekë dhe euro brenda 10 sekondash, në çdo orë të ditës
Banka e Shqipërisë ka miratuar paketën e re rregullative për sistemin e pagesave të menjëhershme IPSA, i cili do të mundësojë kryerjen e transfertave në lekë dhe euro brenda një kohe maksimale prej 10 sekondash. Shërbimi do të jetë i disponueshëm pa ndërprerje, 24 orë në ditë, 7 ditë në javë, gjatë gjithë vitit.
Vendimi u mor në mbledhjen e fundit të Bankës së Shqipërisë dhe përfshin gjithashtu rregullore për funksionimin e sistemeve ekzistuese të pagesave ndërbankare AIPS, AIPS EURO dhe AECH. Këto rregulla përcaktojnë mënyrën e funksionimit të sistemeve, si dhe të drejtat dhe detyrimet e pjesëmarrësve.
Transfertat e menjëhershme në lekë dhe euro
Sistemi IPSA do të mundësojë realizimin e pagesave në monedhën vendase dhe euro në kohë reale, duke shkurtuar ndjeshëm kohën e kryerjes së transfertave. Pagesa do të përfundojë brenda 10 sekondash nga momenti kur pranohet nga ofruesi i shërbimit të pagesave të dërguesit.
Zbatimi i këtij sistemi është pjesë e një projekti të përbashkët të pesë bankave qendrore të Ballkanit Perëndimor, ku përfshihet edhe Banka e Shqipërisë. Infrastruktura teknologjike dhe mbështetja operacionale ofrohen nga Banka e Italisë, sipas modelit të sistemit evropian të pagesave të menjëhershme TIPS.
Kuadri i ri rregullator synon të përshtatë sistemet shqiptare të pagesave me zhvillimet e tregut dhe të krijojë mundësi për ndërlidhjen e sistemit IPSA me infrastrukturat ekzistuese. Gjithashtu, ndryshimet ligjore zgjerojnë gamën e pjesëmarrësve në sistemet e operuara nga Banka e Shqipërisë, në përputhje me kuadrin e Bashkimit Evropian.
Rregulla të reja për pagesat me kartë
Përveç sistemit të transfertave të menjëhershme, Banka e Shqipërisë miratoi edhe rregulloren “Për tarifat e shkëmbimit për transaksionet e pagesave të bazuara në kartë”.
Rregullorja synon të krijojë një treg më konkurrues dhe transparent për pagesat me kartë, duke vendosur kufij rregullatorë për tarifat e shkëmbimit, të cilat përbëjnë një pjesë të kostove që tregtarët paguajnë për pranimin e kartave.
Ulja e këtyre kostove pritet të krijojë kushte më të favorshme për bizneset dhe të nxisë më shumë tregtarë të pranojnë pagesa elektronike. Për konsumatorët, kjo do të thotë më shumë mundësi për të përdorur kartat si alternativë ndaj parasë fizike.
Sipas Bankës së Shqipërisë, ndryshimet synojnë të forcojnë konkurrencën, të rrisin transparencën e tarifave dhe të zgjerojnë përdorimin e instrumenteve elektronike të pagesës.
Në tërësi, miratimi i paketës së re rregullative përbën një hap drejt modernizimit të tregut shqiptar të pagesave, formalizimit të ekonomisë dhe integrimit financiar të Shqipërisë me Bashkimin Evropian.
