Tregu i makinave elektrike humbet ritmin, Europa shënon rekord shitjesh
Shitjet globale të makinave elektrike pësuan rënie në shtator, duke ndërprerë një seri prej gjashtë muajsh me rritje të pandërprerë. Sipas të dhënave të Benchmark Mineral Intelligence, në mbarë botën u shitën 2.15 milionë automjete elektrike, 2% më pak se në periudhën krahasuese.
Rënia u ndikua kryesisht nga dobësimi i tregjeve në Amerikën e Veriut dhe Kinë, ndërsa Europa regjistroi muajin më të mirë të matur ndonjëherë. Në kontinentin europian u shitën afro 600 mijë automjete elektrike, rreth 10% më shumë se rekordi i mëparshëm, i shënuar në qershor.
Situata ishte ndryshe në Amerikën e Veriut, ku shitjet ranë me 44%, rënia më e fortë mujore e këtij viti. Një nga faktorët që ndikoi në këtë rezultat ishte përfundimi i lehtësive fiskale federale për blerësit e makinave elektrike në SHBA, në fund të shtatorit 2025.
Edhe Kina, tregu më i madh në botë për automjetet elektrike, shënoi rënie prej 18%, me 1.11 milionë makina të shitura. Përballë ngadalësimit të kërkesës së brendshme, prodhuesit kinezë po orientohen gjithnjë e më shumë drejt tregjeve të huaja.
Megjithatë, bilanci për periudhën janar-shtator mbetet pozitiv. Në nëntë muajt e parë të vitit, shitjet globale arritën në 15.5 milionë automjete, me një rritje prej 3% krahasuar me të njëjtën periudhë të vitit të kaluar.
Të dhënat tregojnë se tregu i makinave elektrike po zhvillohet me ritme të ndryshme: Europa vijon zgjerimin, ndërsa Kina dhe Amerika e Veriut përballen me një ngadalësim të kërkesës.
