Kosova shmang zgjedhjet, Justina Shiroka-Pula zgjidhet presidente me 81 vota
Kosova ka zgjedhur presidenten e re në orët e fundit të afatit kushtetues. Justina Shiroka-Pula mori 81 vota në Kuvend dhe pas betimit deklaroi se do të jetë presidente e të gjithë qytetarëve, duke u zotuar për unitet, drejtësi dhe forcim të institucioneve.
Zgjedhja e saj erdhi pas një marrëveshjeje politike që zhbllokoi procesin e zgjedhjes së kreut të shtetit. Kuvendi miratoi më herët ndryshimet në ligjin për Dhomat e Specializuara, një prej kushteve të vendosura nga PDK për pjesëmarrjen në votimin për president.
Kundërkandidatja e Shiroka-Pulës, deputetja e PDK-së Eliza Hoxha, mori një votë. Me zgjedhjen e presidentes së re, Kosova shmangu një tjetër proces zgjedhor, pasi 6 tetori ishte afati i fundit për plotësimin e postit, sipas vendimit të Gjykatës Kushtetuese.
Pas betimit, Shiroka-Pula tha se mandati i saj i përket qytetarëve dhe institucioneve të Kosovës.
“Do të jem presidente e gjithë qytetarëve”, deklaroi ajo, duke theksuar se do të punojë për një Kosovë demokratike, të sigurt dhe me orientim euroatlantik.
Shiroka-Pula është ekonomiste, profesoreshë universitare dhe akademike. Ajo ka drejtuar Akademinë e Shkencave dhe Arteve të Kosovës dhe më herët ka shërbyer si ministre e Energjisë dhe Minierave, ndërsa ka qenë edhe deputete e Kuvendit.
Zgjedhja e saj mbyll procesin e zgjedhjes së kreut të shtetit pas një periudhe të gjatë ngërçi politik, që kishte çuar edhe në zgjedhje të parakohshme parlamentare në qershor të vitit 2026.
