Preshevë, nisin punimet për fushën e re të futbollit
Në Preshevë kanë nisur punimet për ndërtimin e një fushe të re futbolli, pjesë e nismës së Federatës Shqiptare të Futbollit për krijimin e dy hapësirave sportive në Luginën e Preshevës. Ndërhyrja e parë në terren është ndërtimi i sistemit të drenazhimit.
Pasi të përfundojë kjo fazë, projekti do të vijojë me përgatitjen e bazamentit dhe shtrimin e tapetit me bar artificial. FSHF-ja do të sigurojë gjithashtu portat dhe pajisjet e nevojshme për funksionimin e fushës.
Hapësira e re synon t’u japë fëmijëve dhe të rinjve të Preshevës mundësi të stërviten në kushte më të përshtatshme. Fusha pritet të shërbejë si për zhvillimin e aktiviteteve sportive, ashtu edhe për nxitjen e talenteve të reja në këtë trevë.
Nisma nuk kufizohet vetëm në Preshevë. Projekti parashikon ndërtimin e një fushe tjetër në Bujanoc, duke zgjeruar investimin sportiv të federatës në Luginën e Preshevës.
Ndërsa punimet kanë nisur, FSHF-ja u ka bërë thirrje bizneseve, sipërmarrësve dhe donatorëve që të kontribuojnë në realizimin e projektit. Sipas federatës, mbështetja e tyre mund të ndihmojë që fushat t’i shërbejnë komunitetit dhe brezave të rinj për një kohë të gjatë.
