Shqiptarët më mosbesuesit në rajon, vetëm 3.7 pikë për besimin te njerëzit
Shqipëria renditet e fundit në Ballkanin Perëndimor për nivelin e besimit mes njerëzve, sipas raportit Balkan Barometer 2025, të publikuar nga Këshilli i Bashkëpunimit Rajonal (RCC). Në një shkallë nga 1 në 10, ku vlerat më të ulëta tregojnë më shumë mosbesim, vendi ynë regjistron një mesatare prej 3.7 pikësh, kundrejt 4.6 pikëve që është mesatarja e rajonit.
Të dhënat tregojnë një diferencë të dukshme me vendet e tjera. Kosova kryeson me 5.2 pikë, e ndjekur nga Bosnjë-Hercegovina dhe Mali i Zi me nga 5.1 pikë. Serbia shënon 4.8 pikë, ndërsa Maqedonia e Veriut 4.0 pikë. Shqipëria mbetet kështu edhe nën rezultatin e vendit të dytë më të ulët në renditje.
Një tjetër tregues që nxjerr në pah këtë prirje është përqindja e qytetarëve që mendojnë se duhet treguar shumë kujdes në marrëdhëniet me të tjerët. Plot 33% e shqiptarëve zgjedhin nivelin më të ulët të shkallës së besimit, përqindja më e lartë në rajon. Në Maqedoninë e Veriut kjo shifër është 22%, në Serbi 17%, në Kosovë dhe Bosnjë-Hercegovinë nga 13%, ndërsa në Mal të Zi 11%.
Sipas RCC-së, besimi ndërpersonal mbetet i kufizuar në të gjithë Ballkanin Perëndimor, por në Shqipëri mosbesimi është më i theksuar. Raporti mat besimin e përgjithshëm mes qytetarëve dhe nuk lidhet me besimin ndaj qeverisë apo institucioneve si policia dhe gjykatat.
