Tirana investon në turizmin natyror, dy zona rurale me shtigje të reja
Baldushku dhe Shëngjergji pritet të kenë infrastrukturë më të mirë për vizitorët, përmes një projekti që synon zhvillimin e turizmit në natyrë. Agjencia e Parqeve dhe Rekreacionit ka hapur një tender me fond limit rreth 11 milionë lekë për sistemimin e dy itinerareve turistike, me gjatësi të kombinuar rreth 35.6 kilometra.
Itinerari i parë do të përmirësojë aksesin drejt Ujëvarës së Kakunjës në Baldushk. Në një gjatësi prej rreth 9.6 kilometrash parashikohen pastrimi dhe stabilizimi i terrenit, kanale kulluese, sinjalistikë orientuese dhe tri pika pushimi me stola druri.
Ndërhyrja e dytë përfshin zonën pyjore Fag–Verri në Shëngjergj, ku është planifikuar një itinerar rreth 26 kilometra që lidh disa pika natyrore, përfshirë rezervuarët e Kollagjeshit dhe Shpellzën. Projekti parashikon përmirësimin e kalueshmërisë, shkallë e parmakë në segmentet e vështira, një urë të vogël prej druri dhe pika pushimi.
Në zonën e Liqeneve të Kollagjeshit propozohet gjithashtu krijimi i hapësirave për piknik, kamping dhe aktivitete sportive. Synimi është rritja e sigurisë dhe e aksesit për vizitorët, duke ruajtur karakterin natyror të zonave.
