Inteligjenca artificiale po ndryshon tregun e punës, Banka Botërore: Një në pesë punonjës është i ekspozuar
Inteligjenca artificiale po ndryshon mënyrën e kryerjes së shumë profesioneve, nga administrata dhe gazetaria te kontabiliteti dhe programimi. Sipas një raporti të Bankës Botërore, rreth një në pesë punonjës në rajonin e Europës dhe Azisë Qendrore ushtron një profesion të ekspozuar ndjeshëm ndaj kësaj teknologjie.
Megjithatë, ekspozimi ndaj inteligjencës artificiale nuk nënkupton automatikisht humbjen e vendit të punës. Ndikimi pritet të jetë i ndryshëm sipas profesionit dhe aftësisë së punonjësve për t’u përshtatur me teknologjitë e reja.
Pavarësisht këtij zhvillimi, përdorimi i inteligjencës artificiale në bizneset e rajonit mbetet i kufizuar. Më pak se 10% e kompanive e kanë integruar atë në aktivitetin e tyre, kryesisht për komunikimin me klientët, përgatitjen e dokumenteve dhe përpunimin e informacionit.
Ndërkohë, kërkesa për punonjës me aftësi në inteligjencën artificiale është pothuajse katërfishuar. Banka Botërore thekson se investimet në aftësitë digjitale dhe përshtatja e arsimit me nevojat e tregut do të jenë vendimtare për të përballuar transformimin e punësimit në vitet e ardhshme.
