Shqipëria mbyll një tjetër kapitull të negociatave me BE-në, sfida e radhës te drejtësia dhe bujqësia
Shqipëria ka mbyllur negociatat për Kapitullin 20 të acquis së Bashkimit Evropian, që lidhet me ndërmarrjet dhe politikën industriale. Sipas autoriteteve, vendi ka përafruar legjislacionin me standardet e BE-së në këtë fushë dhe ka përmbushur reformat e kërkuara për mbylljen e negociatave.
Kryeministri Edi Rama e cilësoi këtë zhvillim si një hap që mund të forcojë mundësitë për investime, inovacion, rritje të konkurrueshmërisë dhe krijim vendesh pune.
Me mbylljen e Kapitullit 20, Shqipëria ka përfunduar negociatat për katër kapituj. Në korrik, pas Konferencës së IX Ndërqeveritare Shqipëri–BE, u zyrtarizua mbyllja provizore e kapitujve për Shkencën dhe Kërkimin, Arsimin dhe Kulturën, si dhe Marrëdhëniet me Jashtë.
Megjithatë, rruga drejt anëtarësimit mbetet e gjatë. Nga 33 kapitujt e negociatave, vendit i mbeten edhe 29 për t’u mbyllur, ndërsa objektivi i përcaktuar nga Shqipëria dhe BE-ja është përfundimi i negociatave deri në vitin 2027.
Kapitujt e mbyllur deri tani përfshijnë fusha ku përafrimi i legjislacionit është më i kufizuar në vëllim. Ndërsa procesi përparon, vëmendja pritet të përqendrohet te fusha që kërkojnë ndryshime më të thella ligjore dhe institucionale, si drejtësia, bujqësia, siguria ushqimore dhe mjedisi.
Një nga sfidat kryesore është grupkapitulli 1, i njohur si “Themelorët”. Ai përfshin pesë kapituj që lidhen me gjyqësorin dhe të drejtat themelore, por edhe me statistikat, prokurimin publik, kontrollin financiar, drejtësinë, lirinë dhe sigurinë. Kjo fushë ka peshë të veçantë në procesin e anëtarësimit, pasi lidhet drejtpërdrejt me funksionimin e institucioneve dhe zbatimin e standardeve evropiane.
Edhe tregu i brendshëm kërkon punë të konsiderueshme, për shkak të numrit të madh të kapitujve dhe nevojës jo vetëm për përafrimin, por edhe për zbatimin e legjislacionit. Përtej miratimit të ligjeve, procesi kërkon institucione funksionale, administratë të përgatitur dhe mekanizma që garantojnë zbatimin e rregullave në praktikë.
Mbyllja e Kapitullit 20 shënon një tjetër hap në negociata, por ritmi i mëtejshëm do të varet nga përmbushja e kritereve në të gjitha fushat. Sfida për Shqipërinë mbetet të përshpejtojë reformat dhe të përmbushë standardet e BE-së, në mënyrë që objektivi i vitit 2027 për përfundimin e negociatave të jetë i arritshëm.
