Shqipëri-Turqi, mbrojtja në fokus: nga trajnimet te projektet e përbashkëta
Ministri i Mbrojtjes, Ermal Nufi, zhvilloi një vizitë zyrtare në Ankara, ku u takua me homologun turk Yaşar Güler. Në qendër të bisedimeve ishte forcimi i bashkëpunimit në mbrojtje dhe siguri, me fokus te projekte konkrete dhe rritja e kapaciteteve të Forcave të Armatosura shqiptare.
Nufi vlerësoi mbështetjen e Turqisë për modernizimin e ushtrisë shqiptare dhe theksoi rëndësinë e trajnimit të personelit shqiptar në institucionet ushtarake turke. Sipas tij, bashkëpunimi do të vijojë në modernizim, zhvillim kapacitetesh dhe rritje të ndërveprueshmërisë sipas standardeve të NATO-s.
Një tjetër pikë e diskutimeve ishte përfshirja e kompanive turke në investime dhe ndërmarrje të përbashkëta në Shqipëri. Tirana sheh mundësi për transferim teknologjie dhe zhvillim të industrisë vendase të mbrojtjes.
Dy ministrat diskutuan gjithashtu angazhimet e dy vendeve në KFOR dhe EUFOR ALTHEA, duke kërkuar një bashkëpunim më të strukturuar, me projekte konkrete dhe rezultate të matshme.
