Zemra “rinovohet” pas transplantit/ Studimi i Harvard zbulon ndikimin e trupit të ri
Një studim i ri sugjeron se mosha biologjike e zemrës nuk është e pandryshueshme, por mund të ndikohet nga organizmi ku transplantohet.
Studiuesit analizuan transplante zemre te minjtë, duke vendosur organe të vjetra në trupa të rinj dhe anasjelltas. Zemrat e vjetra të transplantuara te minjtë e rinj shfaqën shenja të “rinovimit” në nivel molekular, ndërsa zemrat e reja në organizma më të vjetër treguan përshpejtim të proceseve të plakjes.
Gjetjet u mbështetën edhe nga analizat e të dhënave të biopsive historike të pacientëve me transplant zemre. Sipas studiuesve, organet e transplantuara duket se përshtatin disa nga treguesit e tyre biologjikë me moshën e marrësit, përfshirë modelet e metilimit të ADN-së.
Studimi, i publikuar si preprint në bioRxiv, mund të hapë rrugë për rishikimin e kritereve aktuale të përzgjedhjes së organeve për transplant, edhe pse nevojiten kërkime të mëtejshme për të përcaktuar se sa i qëndrueshëm dhe klinikisht i rëndësishëm është ky efekt.
