Vera po zgjatet në Shqipëri: deri në 25 ditë më shumë nxehtësi
Shqipëria përjetoi një verë dukshëm më të nxehtë se normalja, me temperatura deri në 2.5°C mbi mesataren dhe deri në 25 ditë shtesë me temperatura mbi 25°C në pjesën më të madhe të territorit.
Të dhënat e Shërbimit të Copernicus për Ndryshimet Klimatike tregojnë se muajt qershor, korrik dhe gusht 2026 sollën temperatura dukshëm mbi mesataren e periudhës 1991-2020 në Shqipëri dhe në pjesën më të madhe të Europës Jugore.
Sipas hartave të Copernicus, temperatura mesatare e ajrit në Shqipëri gjatë verës ishte rreth 1 deri në 2.5°C më e lartë se norma klimatike, me diferenca që ndryshojnë sipas zonave.
Rritja e temperaturave u reflektua edhe në zgjatjen e periudhës së ditëve të nxehta. Në pjesën më të madhe të vendit u regjistruan rreth 15 deri në 25 ditë më shumë me temperatura maksimale mbi 25°C krahasuar me mesataren e viteve 1991-2020.
Nxehtësia ekstreme ishte një tjetër karakteristikë e verës. Shqipëria u përfshi në zonat ku u regjistrua “stres shumë i fortë nga nxehtësia”, sipas indeksit UTCI. Ky tregues nuk mat temperaturën reale të ajrit, por vlerëson nxehtësinë që përjeton trupi duke marrë në konsideratë temperaturën, lagështinë, erën dhe rrezatimin diellor.
Edhe reshjet nuk patën një shpërndarje të njëtrajtshme. Ndërsa fillimi i verës paraqiti një situatë më të përzier, gushti ishte dukshëm më i thatë në pjesë të territorit shqiptar, në një kohë kur e gjithë Europa Juglindore përjetoi mungesa të theksuara të reshjeve dhe rënie të lagështisë së tokës.
Në disa zona të Ballkanit, lagështia e tokës arriti nivele rekord të ulëta. Kombinimi i temperaturave të larta dhe mungesës së reshjeve rriti gjithashtu treguesit e thatësirës, pasi temperaturat e larta shtojnë humbjen potenciale të ujit nga toka.
Në nivel europian, vera e vitit 2026 ishte 1.17°C më e ngrohtë se mesatarja 1991-2020, duke u renditur si vera e tretë më e ngrohtë e regjistruar në të dhënat ERA5, pas viteve 2024 dhe 2022.
Rreth 41% e territorit europian përjetoi temperatura dukshëm mbi mesataren, ndërsa 22% e sipërfaqes së kontinentit regjistroi rekorde sezonale.
Raporti i Copernicus e përshkruan verën 2026 si një periudhë të karakterizuar nga nxehtësi e pazakontë dhe e zgjatur, kushte të thata, ulje të prurjeve të lumenjve dhe rritje të aktivitetit të zjarreve. Për Shqipërinë, të dhënat e verës japin një tjetër sinjal të ndikimit në rritje të temperaturave dhe episodeve të zgjatura të nxehtësisë në rajon.
