Alzheimeri si “diabet i tipit 3”? Shkencëtarët po hetojnë lidhjen me insulinën
Termi nuk është diagnozë mjekësore, por një hipotezë kërkimore që lidh Alzheimerin me çrregullimet e metabolizmit të glukozës dhe rezistencën ndaj insulinës në tru.
Alzheimeri mund të ketë një lidhje më të fortë me metabolizmin e sheqerit nga sa mendohej më parë. Për më shumë se dy dekada, disa studiues kanë përdorur termin “diabeti i tipit 3” për të përshkruar ndryshimet në mënyrën se si truri përdor insulinën dhe glukozën te disa pacientë me Alzheimer.
Megjithatë, “diabeti i tipit 3” nuk është një diagnozë zyrtare. Bëhet fjalë për një koncept shkencor që po studiohet për të kuptuar më mirë lidhjen mes çrregullimeve metabolike dhe neurodegjenerimit.
Insulina nuk prodhohet vetëm nga pankreasi. Truri gjithashtu prodhon insulinë dhe kërkimet po përpiqen të zbulojnë më qartë rolin që ajo luan në funksionimin e neuroneve, kujtesën dhe proceset e të mësuarit.
Disa studime kanë gjetur ndryshime të rëndësishme në metabolizmin e glukozës në trurin e personave me Alzheimer. Këto ndryshime mund të ndikojnë në mënyrën se si qelizat nervore marrin dhe përdorin energjinë.
Një studim pas vdekjes, i publikuar në vitet e fundit, ka evidentuar gjithashtu ndryshime të mëdha metabolike në indet e trurit të pacientëve me demencë, përfshirë procese që lidhen me energjinë qelizore, metabolizmin e glukozës dhe inflamacionin.
Ndërkohë, një tjetër studim i kohëve të fundit, i kryer në indet e trurit të tre personave që kishin vdekur nga Alzheimeri, gjeti ndryshime në përpunimin e sheqernave krahasuar me trurin e personave pa sëmundjen.
Hipoteza ka ngjashmëri me diabetin e tipit 2, ku qelizat bëhen më pak të ndjeshme ndaj insulinës. Në rastin e Alzheimerit, studiuesit po shqyrtojnë nëse një mekanizëm i ngjashëm mund të ndikojë në aftësinë e qelizave të trurit për të përdorur glukozën.
Megjithatë, shkencëtarët nuk janë në një mendje për përdorimin e termit “diabeti i tipit 3”. Kritikët argumentojnë se provat ende nuk janë të mjaftueshme për ta klasifikuar Alzheimerin si një formë diabeti dhe se kjo qasje mund të thjeshtojë një sëmundje që ka mekanizma dhe forma të ndryshme.
Për këtë arsye, termi mbetet një hipotezë dhe jo një klasifikim mjekësor. Studiuesit po vazhdojnë të hetojnë nëse çrregullimet e insulinës dhe metabolizmit të glukozës mund të luajnë një rol të rëndësishëm në zhvillimin e disa formave të Alzheimerit.
