Hekurudha Shqipëri–Kosovë në studim të ri, Prishtina kërkon zgjatjen drejt Serbisë
Projekti hekurudhor që synon të lidhë Shqipërinë me Kosovën do të vlerësohet përmes një studimi të ri fizibiliteti. Ministri i Infrastrukturës dhe Energjisë, Enea Karakaçi, njoftoi se do të shqyrtohet lidhja Durrës–Kosovë, ndërsa pala kosovare kërkon që linja të vazhdojë deri në kufirin me Serbinë.
Agjencia Franceze e Zhvillimit ka shprehur gatishmërinë për të financuar studimin. Sipas Karakaçit, synohet edhe përfshirja e projektit në rrjetet europiane të transportit, çka do të mundësonte aplikimin për financim nga Bashkimi Europian dhe institucione të tjera financiare.
Një studim i mëparshëm, i porositur nga Hekurudha Shqiptare, shqyrtoi segmentin Shkodër–Gjakovë. Ai e vlerësoi projektin teknikisht të realizueshëm dhe ekonomikisht të qëndrueshëm, duke rekomanduar vijimin në fazën tjetër.
Sipas atij projekti, linja e re Shkodër–Gjakovë do të ishte 105.8 kilometra e gjatë dhe do të kishte shtatë stacione. Për ndërtimin parashikoheshin 43 ura dhe 14 tunele, me gjatësi të përgjithshme 35.3 kilometra. Kostoja e këtij segmenti ishte përllogaritur në rreth 1.8 miliardë euro.
Për lidhjen Durrës–Shkodër ishte parashikuar përdorimi i gjurmës ekzistuese Vorë–Hani i Hotit. Studimi i ri pritet të përcaktojë shtrirjen dhe koston e variantit të zgjeruar drejt kufirit me Serbinë. Projekti mbetet në fazën e studimeve, ndërsa sigurimi i financimit do të jetë vendimtar për vijimin e tij.
