Kush prodhon më shumë fruta në Shqipëri? Renditja surprizon me disa bashki
Të dhënat e INSTAT për vitin 2025 tregojnë një hartë të ndryshme të prodhimit bujqësor, ku Korça, Elbasani, Berati dhe Lushnja kryesojnë sipas llojit të frutit
Prodhimi i frutave në Shqipëri ka disa qendra të dallueshme, me bashki të ndryshme që dominojnë në varësi të kulturës bujqësore. Të dhënat e INSTAT për vitin 2025 tregojnë se prodhimi është i përqendruar në disa zona, nga Korça dhe Maliqi në juglindje, deri në Lushnjë, Elbasan e Berat.
Korça dhe Maliqi, në krye për mollët
Në prodhimin e mollëve, Korça mban vendin e parë në rang vendi, me rreth 17.7 mijë ton të prodhuara gjatë vitit 2025. Shumë pranë saj renditet Maliqi, me rreth 17.2 mijë ton, ndërsa Devolli zë vendin e tretë me afro 13 mijë ton.
Në skajin tjetër, prodhimi i mollëve është dukshëm më i ulët në bashki si Libohova, Dropulli dhe Saranda.
Elbasani dominon te kumbullat dhe qershitë
Elbasani shfaqet si një prej qendrave më të rëndësishme të frutikulturës shqiptare. Bashkia kryeson prodhimin e kumbullave, me 2,513 ton, e ndjekur nga Pogradeci me 1,546 ton dhe Kruja me 1,512 ton.
Edhe për qershitë, Elbasani renditet i pari, me 2,868 ton. Diferenca me vendin e dytë është e ndjeshme, pasi Pogradeci ka prodhuar rreth 1,504 ton, ndërsa Berati renditet i treti me 1,101 ton.
Berati, mbreti i fiqve
Në prodhimin e fiqve, kryesimin e merr Berati. Bashkia ka regjistruar 5,438 ton prodhim gjatë vitit 2025, duke lënë pas me diferencë të konsiderueshme Shkodrën, e cila renditet e dyta me 1,708 ton.
Pas tyre vijnë Elbasani me 1,346 ton dhe Fieri me 1,146 ton. Prodhim të konsiderueshëm raportohet gjithashtu në Tiranë dhe Lushnjë, ndërsa pjesa tjetër e bashkive ka nivele më të ulëta.
Lushnja kryeson te pjeshkët dhe nektarinat
Kur bëhet fjalë për pjeshkët dhe nektarinat, qendra e gravitetit zhvendoset drejt Myzeqesë. Lushnja kryeson me 4,725 ton prodhim në vitin 2025.
Pas saj renditen Peqini me 2,756 ton, Fieri me 2,717 ton dhe Elbasani me 2,354 ton. Në nivele të konsiderueshme janë edhe Cërriku, Rrogozhina dhe Kuçova.
Të dhënat tregojnë kështu një ndarje të qartë të profilit të prodhimit: Korça dhe Maliqi dominojnë te mollët, Elbasani te kumbullat dhe qershitë, Berati te fiqtë, ndërsa Lushnja te pjeshkët dhe nektarinat.
