LOADING...

Shko në fillim

LiveRadio Kontakt
 Kosovë, kabineti qeveritar diskutoi për situatën aktuale në vend

Kosovë, kabineti qeveritar diskutoi për situatën aktuale në vend

Kryeministri Kurti ka përsëritur thirrjen nga kabineti qeveritar që “mos të bojkotohen ose braktisen institucionet e Kosovës, të cilat i shërbejnë çdonjërit pa dallim”

Me ftesë të kryeministrit të Republikës së Kosovës, Albin Kurti, kabineti qeveritar ka mbajtur një takim që në rend të ditës së djeshme kishte diskutimin për situatën aktuale dhe zhvillimet e fundit në vend.

Zyra e Kryeministrit njoftoi se kryeministri Kurti në këtë takim ka thënë se ligjshmëria dhe kushtetutshmëria e Republikës nuk mund të komprometohen, ndërkaq që dialogu dhe institucionet nuk kanë alternativë.

Kurti ka përsëritur thirrjen nga kabineti qeveritar që “mos të bojkotohen ose braktisen institucionet e Kosovës, të cilat i shërbejnë çdonjërit pa dallim”.

“Duke theksuar rëndësinë e mbarëvajtjes së punës së institucioneve dhe shërbimeve që ato ofrojnë, gjatë diskutimit u konfirmua se institucionet vartëse të secilës ministri kanë vazhduar pandërprerë përmbushjen e detyrave në kuadër përgjegjësive që kanë”, thuhet në komunikatë.

Qeveria e Republikës së Kosovës mbetet e përkushtuar për sundim të ligjit, respektim të të drejtave dhe lirive të njeriut dhe pakicave, barazi, shërbim ndaj qytetarëve, paqe dhe siguri, theksohet më tej.

Mbledhja e kabinetit qeveritar erdhi pas dorëheqjes së udhëheqësve serbë nga institucionet kosovare, përfshirë Qeverinë, Kuvendin, pozitat e kryetarëve në katër komunat me shumicë serbe, policinë, gjyqësorin, prokurorinë e administratën derisa të njëjtit kanë mbajtur edhe protestë të dielën në qendër të Mitrovicës së Veriut.

Gjatë ditës së djeshme ministri i Brendshëm, Xhelal Sveçla vizitoi veriun e vendit derisa tha se gjithë pjesëtarët e Policisë së Kosovës me përkushtim janë duke përmbushur detyrat e tyre zyrtare duke siguruar ambient të qetë dhe shërbime për të gjithë qytetarët si në pikat kufitare ashtu edhe brenda gjithë territorit të Republikës së Kosovës.

Dorëheqja e Listës Serbe nga institucionet kosovare erdhi pas vendimit tre-fazësh të Qeverisë së Kosovës për legalizimin e targave ilegale që ende qarkullojnë kryesisht në komunat me shumicë serbe në ato “RKS”, si dhe pas vendimit të autoriteteve të Kosovës për suspendimin e drejtorit të Policisë së Kosovës për rajonin e veriut, Nenad Gjuriq, i cili refuzoi zbatimin e këtij vendimi të Qeverisë.

 

 

 

/AA

Prev Post

Raporti i ri: Europianët, 3,000 euro më të varfër çdo vit që pas krizës financiare

Next Post

Ja si do të jetë moti këtë javë

post-bars

Leave a Comment