Kryetari i Kuvendit të Kosovës, Glauk Konjufca, ka pritur të martën një delegacion të Komisionit për Politikën e Jashtme të Kuvendit të Shqipërisë, të kryesuar nga Mimi Kodheli, kryetare.

Siç bëhet e ditur nga një komunikatë, në takim u diskutua për bashkëpunimin e ngushtë që Kosova dhe Shqipëria kanë ndërtuar në shumë fusha, veçanërisht në rrafshin parlamentar, por gjithashtu u shtrua nevoja e shfrytëzimit të hapësirave për të thelluar më tej këto marrëdhënie.

Konjufca, tha se vizitat e ndërsjella të delegacioneve të ndryshme të parlamenteve respektive kontribuojnë në këmbimin e përvojave dhe avancojnë më tej bashkëpunimin ndërparlamentar.

“Vendet dhe parlamentet tona janë vëllazërore, andaj përballë sfidave rajonale dhe globale duhet të jemi sa më afër njëri-tjetrit. Këto vizita dëshmojnë intensifikimin e marrëdhënieve dhe të bashkëpunimit ndërparlamentar”, ka thënë ai.

Kryetarja e delegacionit nga Kuvendi i Shqipërisë, Mimi Kodheli, sipas komunikatës, ka vlerësuar frytet e bashkëpunimit ndërmjet dy vendeve, ndërsa gjithashtu ka konfirmuar mbështetjen e vazhdueshme të Tiranës zyrtare për Kosovën në të gjitha sferat.

Ajo tha se Kosova dhe Shqipëria janë pjesë të të njëjtit komb.

Kodheli foli gjithashtu për takimet e qeverive të të dyja vendeve dhe për marrëveshjet e arritura, për të cilat tha se kanë nevojë për mbështetjen e parlamenteve.

Gjatë takimit u shkëmbyen informacione dhe ide për zhvillimet politike e ekonomike në Shqipëri e Kosovë, si dhe u shqyrtuan mundësitë e përafrimit të mëtejmë të të dyja vendeve, në të gjitha fushat.

Rruga Press