Numri i njerëzve të zhvendosur me forcë në mbarë botën arriti në 120 milionë në vitin 2023, duke u rritur ndjeshëm për të 12-tin vit radhazi, tha Agjencia e OKB-së për Refugjatët (UNHCR).

Duke nënvizuar se shifra e re përfaqëson “nivele të reja historike”, UNHCR-ja tha në një raport se ajo pasqyron si konflikte të reja, ashtu edhe ato që ndryshojnë, si dhe një “dështim për të zgjidhur krizat e vjetra”.

“Shifra do ta bënte popullsinë globale të zhvendosur të barabartë me vendin e 12-të më të madh në botë, rreth madhësisë së Japonisë”, thuhet në raport.

Agjencia vuri në dukje konfliktin në Sudan si “një faktor kyç që ka rritur shifrat, pasi që nga prilli 2023, më shumë se 7,1 milionë zhvendosje të reja u regjistruan brenda vendit, me 1,9 milion të tjerë jashtë”.

Në fund të vitit 2023, gjithsej 10,8 milionë sudanezë u larguan nga shtëpitë e tyre, shtoi ajo.

Për më tepër, raporti tha se miliona u zhvendosën brenda vitit të kaluar nga luftimet e ashpra në Republikën Demokratike të Kongos dhe Mianmar.

Duke cituar vlerësimet e agjencisë së OKB-së për refugjatët palestinezë (UNRWA), raporti tha se deri në 1,7 milion njerëz – 75 për qind e popullsisë – u zhvendosën në Rripin e Gazës nga “dhuna katastrofike”, ndërsa disa refugjatë janë “zhvendosur disa herë”.

Agjencia shtoi se Siria mbetet “kriza më e madhe në botë e zhvendosjes”, me 13,8 milionë të zhvendosur me forcë brenda dhe jashtë vendit.

“Pas këtyre shifrave të zymta dhe në rritje fshihen tragjedi të panumërta njerëzore. Kjo vuajtje duhet të nxisë komunitetin ndërkombëtar që të veprojë urgjentisht për të trajtuar shkaqet rrënjësore të zhvendosjes së detyruar”, ka thënë në një deklaratë për shtyp Filippo Grandi, komisioneri i lartë i OKB-së për refugjatët.

“Është koha e fundit që palët ndërluftuese të respektojnë ligjet bazë të luftës dhe të drejtën ndërkombëtare”, ka thënë Grandi, duke theksuar se shifrat e zhvendosjes “do të vazhdojnë të rriten, duke sjellë mjerim të ri dhe përgjigje të kushtueshme humanitare” pa bashkëpunim më të mirë dhe përpjekje të përbashkëta për të adresuar konfliktet, shkeljet e të drejtave të njeriut dhe krizën klimatike.

Rritja më e madhe në shifrat e zhvendosjes erdhi nga individët që ikin nga konflikti, por mbeten në vendin e tyre të origjinës. Sipas Qendrës së Monitorimit të Zhvendosjeve të Brendshme, ky numër është rritur në 68,3 milionë njerëz, që përfaqëson një rritje gati 50 për qind gjatë pesë viteve të fundit.

Numri i refugjatëve dhe njerëzve të tjerë që kanë nevojë për mbrojtje ndërkombëtare ka arritur në 43,4 milionë, sipas të dhënave nga UNHCR-ja dhe UNRWA-ja. Shumica e refugjatëve strehohen në vendet fqinje, me 75 për qind që banojnë në vende me të ardhura të ulëta dhe të mesme që së bashku kontribuojnë më pak se 20 për qind në PBB-në globale.

Raporti zbuloi se në nivel global, mbi pesë milionë njerëz të zhvendosur brenda vendit dhe një milion refugjatë janë kthyer në vendet e tyre të origjinës në vitin 2023.

“Refugjatët – dhe komunitetet që i presin ata – kanë nevojë për solidaritet dhe një dorë ndihme. Ata mund dhe kontribuojnë në shoqëri kur përfshihen”, ka thënë Gandi.

“Në mënyrë të barabartë, vitin e kaluar, miliona njerëz u kthyen në shtëpi, duke përfaqësuar një dritë të rëndësishme shprese. Zgjidhjet janë atje – ne kemi parë vende si Kenia të udhëheqin rrugën në përfshirjen e refugjatëve – por kjo kërkon angazhim të vërtetë”. /AA