Shko në fillim

LiveRadio Kontakt
 Qyteti në artin e Susan Logorecit, artistes Amerikane me origjinë Shqiptare

Qyteti në artin e Susan Logorecit, artistes Amerikane me origjinë Shqiptare

Susan Logoreci është një artiste Amerikane me origjinë Shqiptare lindur dhe rritur në Monterey të Kalifornisë.

Ajo është një pinjolle e familjes Logoreci nga Shkodra, ku babai i saj Zefi i ushqeu fëmijëve të tij dashurinë për artin dhe historinë e vendit të tyre.

Susan u rrit duke vizatuar në mjedisin magjepsës të Kalifornisë dhe pasi kreu shkollën e mesme arriti të fitojë bursë studimi në Institutin e Artit të San Franciskos.

Krijimet e Susan konsistojnë në vizatime me laps me ngjyra të qyteteve nga një këndvështrim ajror.

Veprat i pasqyrojnë hapësirat që ne krijojmë, ndajmë si dhe infrastrukturën e cila i lidh njerëzit me peizazhin, duke i frymëzuar ata që t’i përjetojnë këto vende në mënyra të reja.

Mid City Vibes (Energjitë e mesqytetit”, 33cm. x 56cm, gouache on paper, 2021 – $900

Në krijimtarinë e saj ajo modelon gjeometrikisht për të krijuar një imazh themelor që është njëkohësisht i organizuar dhe kaotik, duke krijuar një formalizëm konceptualist dhe psikologjik.

In the Shadows (Në hije), 23cm. x 30cm., colored pencil on paper, 2018 – $700
San Francisco (Golden Gate Park – Parku i Portës së Artë), 36cm. x 74cm. colored pencil on paper, 2018 – $1500

Veprat e saj me laps me ngjyra në dimensione të mëdha përshkruajnë peizazhin e Los Anxhelosit me mjaft detaje deri në kondicionerët anash dritareve, dritat e rrugëve, palmat dhe dritaret e errëta. Mospërdorimi i vizoreve e bën që të evitojë vijat e drejta, duke e thyer këndvështrimin nga shikimi drejt poshtë në një këndvështrim të zhdrejtë. Ajo e riprodhon imazhin e qytetit jo ashtu siç duket, por me një këndvështrim të sajin.

Duke vëzhguar bulevardet e gjata që shkonin për kilometra të tëra, si dhe detajet e ndërtesave të mëdha dhe të vogla, makinat e parkuara, oborret, mënyrën se si e rastësishmja përshtatet në të tërën ajo filloi të eksperimentonte me këto imazhe përmes një këndvështrimi ndryshe.

Fillimisht Galeria Cirrus në Los Anxhelos ekspozoi vizatimet e Susan deri sa tërhoqi vëmendjen e prestigjozeve “L.A. Times” dhe “Art in America”. Më pas, krijimet e saj filluan të blihen nga shumë kompani private. Në verën e vitit 2005, ajo merr porosinë e parë të rëndësishme për një triptik në Selinë e Bankës Kombëtare të Los Anxhelesit.

Night Lights (Dritat e natës), 33cm. x 56cm., gouache on paper, 2021 – $1000

Krijimet e saj u bënë joshëse për institucionet me hapësira publike, duke filluar me stacionin e trenit të LA. Nuk kaloi shumë kohë dhe do të vinte porosia e cila e vuri në qendër të vëmendjes për komunitetin e artistëve të Los Anxhelesit me një murale prej 30 metra katrorësh në terminalin e Aeroportit LAX.

Mënyra e kompozimit dhe trajtimit origjinal të kësaj muraleje zbërthen qytetin dhe rrugët e tij përmes një drite magjike. Shtëpitë dhe ndërtesat e larta krijojnë një larmi ngjyrash të pafundme.

Pas suksesit të murales në Aeroportin LAX, i cili vendosi ta mbajë si një vepër të përhershme, një tjetër aeroport, kësaj radhe Phoenix në Arizona, ka kërkuar për të projektuar një dysheme ‘terrazzo’ prej 1,500 metrash katrorë në Aeroportin Phoenix Sky Harbor, si dhe 28 vizatime të mëdha në mënyrë që të krijojë një përvojë përjetuese artistike për ambientet e brendshme.

Apartments (Banesat), 46cm. x 61cm., colored pencil on paper, 2019 – $1500

Së fundmi Logoreci është përzgjedhur për të krijuar vepra që do të fabrikohen në një material të qëndrueshëm dhe do të vendosen në pjesën e jashtme të një stacioni të ri zjarrfikësesh në San Diego.

Për vitin e ardhshëm Susan Logoreci është duke planifikuar një ekspozitë personale në Tiranë.

Në bashkëpunim me “Monitor” Susan Logoreci ofron disa nga vizatimet e saj për tregun e artit në vendin tonë./MONITOR

Përgatiti: Genc Përmeti

Prev Post

Albin Tahiri i kërkon Kinës ta njohë Kosovën drejtpërdrejt në televizionin shtetëror kinez

Next Post

Efekti Turqi: Greqia voton armatosjen franceze

post-bars

Leave a Comment