Në librin “Etnologjia e Shqiptarëve” , Kristo Frashëri na e paraqet zbërthimin që Sami Frashëri i kishte bërë tezës romantike/ historike të lidhjes gjenetike pellaze shqiptare.Ndër tjera ai kishte shkruar se çështja e prejardhjes së shqiptarëve , e cila mbeti për shëkuj enigmë, u zgjidh më në fund dhe u provua se kombi shqiptar është dega më e vjetër e familjes së popujve të Azisë e të Europës, e cila quhet familja ariane(indoevropiane), shkruan InforCulture.Info

Më poshtë ju sjellim një pjesë të shkëputur nga libri në fjalë:

Megjithatë, ndryshe nga Abdyl Frashëri dhe Pashko Vasa, Sami Frashëri e zbërtheu edhe më tej tezën romantike historike të lidhjes gjenetike shqiptare pellazge. Në fillim tezën e vet ai e parashtroi në trajtesën e shkurtër turqisht mbi historinë e lashtë të shqiptarëve që përfshiu në zërin Arnavut të “Enciklopedisë Universale të Historisë dhe të Gjeografisë” (Kamus-ul Alam), vëll.I, më 1889. Ai shkruan “Disa historianë kujtojnë se shqiptarët kanë ardhur vonë nga malet e Kaukazit, disa tjerë i bashkojnë me kombet sllave, dhe të tjerët i quajnë si një degë e stërlashtë e helenëve.

Asnjëra nga këto pikëpamje nuk është e saktë.Cështja e prejardhjes së shqiptarëve , e cila mbeti për shëkuj enigmë, u zgjidh më në fund dhe u provua se kombi shqiptar është dega më e vjetër e familjes së popujve të Azisë e të Europës, e cila quhet familja ariane(indoevropiane-K.F). Do të zgjatemi shumë sikur të numërojmë fjalët  shqipe që kanë përngjasime dhe lidhje me gjuhët e vjetra greke, latine, sllave e gjermane apo me gjuhët e reja evropiane që rrjedhin prej tyre apo me persishten , zendishten , sankritishten. Kjo vetëm do të mërziste lexuesin.Nëse bëhet një fjalor etimologjik i gjuhës  shqipe , mund të themi se do të mbeten pak fjalë që nuk kanë lidhje më njërën apo me tjetrën nga gjuhët e përmendura. Është e pamundur të jepet një gjykim për këto fjalë me prejardhje të panjohur se nga cila gjuhë tjetër ato kanë buruar.

Përkundrazi ka shumë fjalë që forma e tyre shqip është origjinale dhe forma në greqisht e në latinishten e vjetër është një derivate I tyre. Ky fakt tashmë i provuar, tregon se gjuha shqipe është më e vjetër se greqishtja dhe latinishtja.

Ato tregojnë se kombi shqiptar është tepër i lashtë.Disa fjalë provojnë se gjuha shqipe më tepër se me gjuhët e tjera ariane të Europës, ka lidhje e përngjasime me persishten, zendishten dhe sankritishten. Por kjo nuk do të thotë se shqipja është një degë e re e familjes gjuhësore ariane, sic janë latinishtja, greqishtja e sllavishtja. Ajo është drejtpërsëdrejti pjesë e gjuhës së hershme ariane.Pra populli shqiptar ka ardhur i papërzier me popujt e tjerë, që erdhën direkt nga Azia qendrore, si popujt e tjerë të lashtë arianë”./infocultur