Komisioneri i Përgjithshëm i Agjencisë së OKB-së për Refugjatët Palestinezë në Lindjen e Afërt (UNRWA), Philippe Lazzarini paralajmëroi se nëse nuk arrihet armëpushim në Rripin e Gazës, i cili është nën sulmet izraelite do të zhduket një brez.

Lazzarini në deklaratën e tij në X tha se fëmijët janë të parët dhe më të vuajturit në konflikte dhe luftëra. Ai tha se situata në Gaza nuk është ndryshe.

Duke theksuar se fëmijët po përjetojnë gjëra që asnjë fëmijë në asnjë vend në botë nuk duhet t’i shohë apo përjetojë, Lazzarini tha se shumë njerëz humbën jetën dhe u plagosën ndërsa të mbijetuarit përjetuan trauma të thella.

Ai tha se si rezultat i sulmeve izraelite, shkollat ​​e fëmijëve u shkatërruan dhe ata humbën një vit të tërë shkollor pa arsim dhe lojëra.

“Sulmet ua kanë grabitur fëmijëve fëmijërinë në Gaza”, u shpreh Lazzarini duke bërë thirrje për armëpushim. Ai paralajmëroi se nëse nuk ka armëpushim në Gaza, do të humbet një brez.

Në sulmet e Izraelit në Rripin e Gazës që nga 7 tetori janë vrarë 37.232 palestinezë, mes të cilëve të paktën 15.517 fëmijë dhe 10.279 gra ndërsa 85.037 persona u plagosën.

Raportohet se ende ka mijëra të vdekur nën rrënoja, infrastruktura civile po shkatërrohet duke synuar spitalet dhe institucionet arsimore ku njerëzit ishin strehuar.

Vdekja nga uria

Një tjetër fëmijë humbi jetën nga uria në Rripin e Gazës, i cili ka qenë objektiv i sulmeve brutale dhe bllokadës izraelite, që ka shkaktuar një krizë të madhe humanitare.

Dhjetëvjeçari Mustafa Hijazi vdiq nga kequshqyerja dhe mungesa e ilaçeve në Deir al-Balah, në pjesën qendrore të Rripit të Gazës.

Fotografitë nga Anadolu tregojnë se si nëna Fatma Hijazi me dhimbje mban në duar trupin e pajetë të djalit.

Sipas spitalit Kamal Adwan, më shumë se 200 fëmijë palestinezë janë në rrezik të vdekjes për shkak të kequshqyerjes.

Izraeli ka vazhduar ofensivën e tij brutale në Gaza që nga sulmi i 7 tetorit nga grupi palestinez Hamas, pavarësisht nga një rezolutë e Këshillit të Sigurimit të OKB-së që kërkon armëpushim të menjëhershëm.

Më shumë se 37.260 palestinezë janë vrarë që atëherë në Gaza, shumica prej tyre gra dhe fëmijë, dhe mbi 85.100 të tjerë janë plagosur, sipas autoriteteve lokale shëndetësore.

Tetë muaj pas fillimit të luftës izraelite, pjesë të mëdha të Gazës janë në gërmadha, krahas një bllokade gjymtuese të ushqimit, ujit të pastër dhe ilaçeve.

Izraeli akuzohet për gjenocid në Gjykatën Ndërkombëtare të Drejtësisë, e cila në vendimin e saj të fundit urdhëroi Tel Avivin të ndalojë menjëherë operacionin e tij në qytetin jugor Rafah, ku mbi një milion palestinezë kishin kërkuar strehim nga lufta përpara se të pushtohej më 6 maj. /AA