Sot është vënë zyrtarisht në funksion segmenti i zgjeruar i autostradës Tiranë–Durrës, që shtrihet deri te mbikalimi i Rinasit, një prej akseve më të rëndësishme dhe më të ngarkuara në vend.

Gjatë inspektimit të punimeve ishin të pranishëm Kryeministri Edi Rama, Ministri i Infrastrukturës dhe Energjisë Enea Karakaçi, si dhe drejtues të Autoritetit Rrugor Shqiptar.

Ministri Karakaçi vuri në dukje rëndësinë e këtij projekti, duke theksuar se bëhet fjalë për segmentin më të frekuentuar rrugor në Shqipëri. Ai sqaroi se ndërhyrja përfshin një gjatësi rreth 7 kilometra, e ndarë në disa faza, duke filluar nga zona e Casa Italia deri në daljen e Rinasit. Sipas tij, dy faza janë përfunduar, ndërsa është kontraktuar edhe faza e tretë që do të vijojë deri në zonën e Laknasit.

Ai shtoi se në vijim do të ketë ndërhyrje shtesë për përmirësimin e qarkullimit, përfshirë edhe ndryshime në mbikalimin e Rinasit, i cili aktualisht krijon ngushtim të trafikut. Projekti parashikon prishjen e tij dhe ndërtimin e hyrje-daljeve të reja për aeroportin.

Segmenti i sapopërfunduar është ndërtuar me katër korsi dhe me teknologji të re asfaltimi, e përdorur për herë të parë në vend, duke rritur standardin dhe sigurinë rrugore.

Nga ana tjetër, drejtori i ARRSH-së bëri të ditur se së shpejti do të nisë faza e gjelbërimit të autostradës, e cila pritet të përmirësojë ndjeshëm pamjen e saj. Ai theksoi gjithashtu se punimet po vijojnë në pjesët e tjera të projektit, përfshirë nyjën e Laknasit dhe zgjerimet infrastrukturore përreth Rinasit.

Ministri Karakaçi njoftoi gjithashtu përshpejtimin e afateve për vijimin e zgjerimit të autostradës, duke e afruar nisjen e fazës së ardhshme nga viti 2027 në vitin 2026, me synim vazhdimin e menjëhershëm të punimeve pas kilometrave të përfunduar.

Në të njëjtin kontekst, u theksua edhe avancimi i projekteve të tjera strategjike infrastrukturore, si pjesë e Korridorit Blu. Segmenti Kashar–Lekaj ndodhet në fazat përfundimtare të përgatitjes teknike, ndërsa për aksin Milot–Balldren pritet së shpejti shpallja e fituesit të kontratës.

Sipas autoriteteve, këto investime pritet të ndikojnë ndjeshëm në lehtësimin e trafikut, përmirësimin e lidhjeve mes zonave kryesore të vendit dhe zhvillimin e turizmit, veçanërisht në veri dhe përgjatë bregdetit Adriatik.

Hapja e këtij segmenti shënon një tjetër hap në modernizimin e rrjetit rrugor dhe përmirësimin e infrastrukturës së transportit në vend.