Ditën e sotme mësuesit në gjithë Shqipërinë festojnë ‘7 Marsin’.

Data 7 mars është kthyer në një festë zyrtare për mësuesit, e cila festohet me aktivitete të shumta në shenjë falenderimi për dijet që arsimtarët përcjellin te brezi i ri.

Kjo festë e ka zanafillën te hapja e Mësonjëtores së Parë Shqipe, e cila u hap si sot 137 vite më parë në qytetin e Korçës. Kjo ishte një ngjarje me rëndësi të madhe në përpjekjet e popullit shqiptar për të krijuar shkollën e vet kombëtare. Mësonjëtorja e Korçës qëndroi e hapur për gati 20 vjet. Drejtues të saj ishin figura të njohura të Rilindjes shqiptare si: Pandeli Sotiri, Petro Nini Luarasi, Nuçi Naçi, Thoma Avrami, etj. Kontributi i madh që këta atdhetarë dhe veprimtarë të shquar dhanë për kombin, dëshmohet nga dëshira e zjarrtë që ata kishin për të përhapur dijen në popull.

Presidenti i Shqipërisë, Bajram Begaj, ka pritur në selinë e Presidencës së Shqipërisë mësues në pension.

Në një njoftim nga Presidenca e Shqipërisë thuhet se Presidenti Begaj u shprehu atyre vlerësimin dhe falënderimin në emër të shoqërisë shqiptare “për rolin që ata kanë luajtur në edukimin e brezave me dashuri për gjuhën, arsimin dhe atdheun”.

“Ju, me përkushtimin, pasionin dhe dashurinë tuaj ndaj mësimdhënies, keni ndezur shkëndijat e kureshtjes dhe njohurisë në zemrat e shumë brezave. Historitë tuaja, përvojat dhe mësimet që keni ndarë, janë trashëgimi e çmuar që vijon të frymëzojë breza të tërë”, ka theksuar Begaj, duke iu drejtuar mësuesve në pension.

Kryetarja e Kuvendit të Shqipërisë, Lindita Nikolla, ka uruar mësuesit me rastin e 7 Marsit, me anë të një mesazhi, publikuar nga zyra e shtypit e Kuvendit të Shqipërisë.

“Me rastin e 7 Marsit, Festës së Mësuesit, mirënjohjet dhe urimet e mia të përzemërta për koleget dhe kolegët mësuese e mësues, për dashurinë, dijet dhe vlerat që u japin vajzave dhe djemve të Shqipërisë. Talenti, përkushtimi dhe sakrifica e tyre janë investimi më i mirë për të ardhmen. Sepse progresi i arsimit është kusht dhe faktori kryesor i progresit të vendit”, shprehet kryetarja Nikolla në mesazhin e saj.

Kryeministri Edi Rama ka uruar 7 Marsin me një video të publikuar në rrjetet sociale, me “Himnin e Mësuesit”, kënduar nga nxënësit e shkollave të Tiranës dhe kori i Liceut Artistik në Tiranë, ku ndër të tjera shkruan “me mirënjohjen më të thellë dhe respekt për mësuesit e çdo krahine të Shqipërisë, të trojeve ku flitet shqip dhe diasporë”.

Me rastin e 7 Marsit në vend janë organizuar aktivitete dhe vizita nëpër shkolla të drejtuesve të institucioneve të ndryshme.