“Zgjedhjet në Somali janë vonuar më shumë se një vit. SHBA-ja është e gatshme të marrë masa kundër shkelësve nëse afati i ri kohor i Këshillit Kombëtar Konsultativ nuk përmbushet”, njoftoi Byroja e Çështjeve Afrikane e SHBA-së

Mogadishu

SHBA kërcënoi Somalinë me sanksione nëse nuk e arrin afatin kohor të dakorduar së fundmi për mbajtjen e zgjedhjeve, raporton Anadolu Agency (AA).

“Zgjedhjet në Somali janë vonuar më shumë se një vit. SHBA-ja është e gatshme të marrë masa kundër shkelësve nëse afati i ri kohor i Këshillit Kombëtar Konsultativ nuk përmbushet”, njoftoi Byroja e Çështjeve Afrikane e SHBA-së në Twitter.

Kryeministri somalez Mohamed Hussein Roble e mirëpriti paralajmërimin e SHBA-së.

Zëdhënësi i tij, Mohamed Ibrahim Moalimuu, në një deklaratë për AA tha se kryeministri është i gatshëm të përmbushë detyrat e tij dhe ta çojë vendin drejt zgjedhjeve paqësore.

“Ne e mirëpresim deklaratën dhe pajtohemi që dikush duhet të mbajë përgjegjësi nëse shkel afatin e zgjedhjeve që u hartua nga takimi i Këshillit Kombëtar Konsultativ Somalez nën udhëheqjen e kryeministrit somalez”, tha ai.

Paralajmërimi i SHBA-së vjen disa ditë pasi presidenti somalez Mohamed Abdullahi Mohamed njoftoi se ai përshëndeti rezultatin e takimit gjashtë-ditor të Këshillit Kombëtar Konsultativ, në të cilin liderët ranë dakord të përfundojnë zgjedhjet në vijim e sipër të Dhomës së Ulët deri më 25 shkurt, por ai ende nuk ka komentuar paralajmërimin e fundit.

Ekspertët, megjithatë, e përshkruan masën si një veprim simbolik, duke pasur parasysh sfidat dhe faktin se sa e vështirë është bërë gjendja politike në Somali.

Somalia ka hyrë në një krizë politike në më pak se një vit pasi organi elektoral i vendit shkarkoi kryetarin e tij, ndërsa presidenti Mohamed njoftoi se ai kishte pezulluar kompetencat e kryeministrit në lidhje me pretendimet për korrupsion dhe përvetësimin e tokës publike.