Ukrainë, Poroshenko kundër bisedimeve me “terroristët”

Petro Poroshenko, i cili pritet të jetë Presidenti i zgjedhur i Ukrainës është shprehur se nuk do të ketë bisedime me “terroristët”, duke iu referuar separatistëve të armatosur pro-rusë në lindje të vendit.

Poroshenko tha se paqja mund të arrihet përmes një dialogu me ata që ai i quan njerëz, dhe tha se vetëm armët mund të përdoren ndaj atyre që ai i quan vrasës.

Ai gjithashtu tha se dëshiron të hapë bisedime me Moskën, e cila përmes ministrit të saj të jashtëm, Sergei Lavrov, tha se shansi për një dialog me Ukrainën nuk duhet humbur.

Një udhëheqës i rebelëve në Donetsk të Ukrainës tha se ai gjithashtu është i gatshëm të bisedojë me Poroshenkon, por vetëm nëse temë e bisedimeve do të ishte shkëmbimi i të burgosurve dhe tërheqja e forcave ukrainase nga lindja.

Ndërkohë, është ende e paqartë se kush e ka nën kontroll aeroportin e Donetskit, pasi separatistët dje pushtuan disa objekte të aeroportit, duke nxitur një sulm ajror të qeverisë ukrainase.

Share Button