Ja në cilat shtete mund të lëvizin kosovarët pa viza

Korriku mund të jetë muaji kur edhe përfundimisht kosovarët mund të lëvizin lirshëm në zonën Shengen, sipas ministrit të Integrimit Evropian, Bekim Çollaku, i cili ka thënë se ka edhe disa procedura që duhen ndjekur pas lajmit të mirë që mori Kosova sot.

Por, kush e përbën zonën Shengen? Në cilat shtete do të mund të lëvizin lirshëm kosovarët pas heqjes së vizave?

Zona Shengen tani mbulon 26 vende evropiane, 22 nga të cilat janë anëtare të BE-së dhe 4 jo-anëtarë: Islanda, Lihtenshtajni, Norvegjia dhe Zvicra.

Mbretëria e Bashkuar dhe Irlanda nuk kanë dashur të pranojnë heqjen e plotë të kontrolleve kufitare në hyrje të vendeve të tyre, dhe kështu kanë hequr dorë përfundimisht nga zbatimi i marrëveshjes.

Katër anëtaret e reja – Bullgaria, Rumania, Qipro dhe Kroacia – aktualisht nuk janë pjesë e zonës Shengen, por janë të detyruara t’i bashkohen zonës së Shengenit në të ardhmen.

Kjo do të thotë se kosovarët do të mund të lëvizin pa viza në këto shtete: Austri, Belgjikë, Çeki, Danimarkë, Estoni, Finlandë, Gjermani, Greqi, Hungari, Islandë, Itali, Letoni, Francë, Lihtenshtajn, Lituani, Luksemburg, Maltë, Holandë, Norvegji, Poloni, Portugali, Sllovaki, Slloveni, Spanjë, Suedi, Zvicër.

Por, mbetet e paqartë nëse kosovarët do të mund të udhëtojnë në vendet si Spanja, që jo vetëm nuk e kanë njohur Kosovën si shtet, por as nuk e kanë pranuar pasaportën e Kosovës.

Share Button