Barishtet e karrotave, fantastike për shëndetin

Keni dëgjuar për barishtet e karrotave? Janë ato bishtat e gjatë që formojnë një mburojë të gjelbër mbi karrotë. Shumë prej konsumatorëve preferojnë t’i shkulin ato, me shpresën që karrota do të peshojë më pak. Por arsyeja është e gabuar. Barishtet duhen hequr nga karrota për t’i zgjatur jetën asaj, sepse këto barishte heqin lagështinë dhe ndihmojnë në tharjen e parakohshme të karrotës.

E megjithatë, barishtet nuk duhen hedhur tutje. Kur të blini karrota zgjidhni në mënyrë që barishtet t’i kenë në ngjyrë të gjelbër të ndezur dhe jo të zymtë, sepse në këtë mënyrë shija e tyre do të jetë tepër e freskët. Barishtet e karrotave përdoreshin për kurorë nga femrat angleze të viteve 1600, duke zëvëndësuar lulet apo puplat. Në Shqipëri, këto barishte jo vetëm që nuk vihen mbi kokë, por neglizhohen kryesisht për shkak të perceptimit se ka barishte më të mira që mund të konsumohen.

E vërteta është që këto barishte janë të pasura me proteina, vitamina dhe minerale çka i bën ato tepër të dobishme në supa, sallata dhe gatime të tjera. Barishtet e karrotave, majdanozi, selinoja dhe kopra janë pjesë e të njëjtës familje botanike. Spekullimet mbi barishtet e karrotave kanë qenë të pafundme dhe shpesh, të panevojshme. Megjithatë, studimet kanë treguar që këto barishte nuk janë aspak toksike dhe janë të sigurta për t’u konsumuar, veçanërisht pasi janë larë mirë me ujë të bollshëm për të larguar dheun dhe spërkatjet që mund të jenë shpërndarë përmbi to.

Këto spekulime kanë lindur kur fermerët nuk kanë patur mundësi për ujë të bollshëm, por studimet shkencore nuk kanë zbuluar asnjë fakt që të tregojë që barishtet e karrotave kanë më pak vlera ushqimore në krahasim me barishtet e tjera. Paraqitja e këtyre barishteve mund t’ju sjellë ndërmend gjethet e koriandrës apo majdanozit, për shkak të ashpërsisë dhe faktit që nuk janë të lëmuara në formën e tyre natyrale.

Shija e këtyre barishteve është pak e thartë dhe sigurisht që të kujton barin, por teksa e përtyp do të ndjesh shpërthimin e një ëmbëlsie karakteristike.

Vlerat shëndetësore: A janë barishtet e karrotave të shëndetshme?

Të pasura me vitaminë C – Duke qenë se përmbajtja në vitaminë C është gjashtë herë më e lartë se e rrënjës, konsumimi i barishteve së bashku me ushqime të tjera të shëndetshme mund t’ju ndihmojë në mbrojtjen e sistemit imunitar. Për më tepër ato mund të ndihmojnë organizmin të luftojë të ftohtin dhe kollën dhe t’i japë lëkurës suaj shëndetin dhe shkëlqimin e munguar.

Burim i pasur klorofili – Klorofili përmban një sërë përbërësish të rëndësishëm që parandalojnë rritjen dhe zhvillimin e tumoreve. Studime shkencore kanë treguar që barishtet e karrotave kanë aftësinë të parandalojnë rritjen e qelizave kancerogjene dhe si rrjedhojë të parandalojnë formimin e qelizave malinje. Kanë ndikim tek veshkat Klorofili tek barishtet stimulon fluksin e urinës duke ndihmuar në detoksifikimin e organizmit dhe në filtrimin e veshkave. Në këtë mënyrë, minimizohet rreziku i edemës dhe luftohet me sukses formimi i gurëve në veshka, por klorofili ndihmon edhe në shkrirjen e gurëve ekzistues.

Siguron shëndetin e mirë të zemrës – Përfshirja e barishteve të karrotave në dietën tuaj siguron shëndetin e mirë të zemrës. Këto barishte janë të pasura me kalium. Vetitë e tyre antioksiduese ndihmojnë në rregullimin e tensionit të gjakut dhe mbrojtjen e zemrës nga dëmet e shkaktuara nga radikalet e lira.

Përmirësojnë shëndetin e kockave – Përmbajtja e lartë e magnezit ndihmon në tonifikimin, kontraktimin dhe qetësimin e muskujve. Vitamina K nga ana tjetër rrit densitetin e kockave. Barishtet e karrotave kanë një përmbajtje të ekuilibruar të magnezit dhe vitaminës K dhe si rrjedhojë forcojnë kockat dhe minimizojnë shanset për formimin e sëmundjeve si osteoporoza.

Konsumimi i barishteve – Pavarësisht shijes së hidhur, përmbajtja e tyre krokante i bën ato të mira për t’u ngrënë të gjalla në sallatë. Por nga ana tjetër, këto barishte mund të përdoren së bashku me karrotat për lëngje. Shija e tyre që të rrudh gojën, i bën ato perfekte për t’u përzjerë me fruta të ëmbla si mollët apo bananet në përgatitjen e lëngjeve të plota të frutave. Barishtet mund të shtohen në supa të përgatitura me mish pule, viçi apo perime të pjekura e të kavërdisura, si edhe në gatime të tjera të skuqura. Këto barishte mund të transformohen në çaj për të përmirësuar funksionet e veshkës dhe fshikëzës. Mund të përdoren si një alternativë e borzilokut në pregatitjen e salcave por edhe për të zbukuar dhe shumëfishuar shijen e pjatave që kanë nevojë për majdanoz.

Përdorimet mjekësore – Për shkak të vlerave antiseptike, lëngu i barishteve përdoret për të larë gojën, hequr erën e keqe të saj dhe shëruar plagët e brendshme të gojës. Ato mund të përzjehen edhe me mjaltë për të pastruar plagët./AgroWeb.

 

Share Button